“Бүгдээрээ бэлэглэж, бусдыгаа аваръя” уриатай сайн дурын авлагагүй цусны донорын өдөрлөгийг зохион байгууллаа.

Баянзүрх дүүргийн Иргэдийн Төлөөлөгчдийн Хурлаас Цус сэлбэлт Судлалын Үндэсний төв, дүүргийн Улаан Загалмайн хороотой хамтран 2020 оны 09 дүгээр сарын 07-ны өдөр “Бүгдээрээ бэлэглэж, бусдыгаа аваръя” уриатай сайн дурын авлагагүй цусны донорын өдөрлөгийг зохион байгууллаа.

Баянзүрх дүүргийн Иргэдийн Төлөөлөгчдийн Хурлын дарга Ш.Ганчимэг:
- Иргэдийн хурал нь "Бүгдээрээ бэлэглэж, бусдыгаа аваръя" өдөрлөгийг 6 дахь жилдээ амжилттай зохион байгуулж байна. Энэхүү өдөрлөгөөр дамжуулан өнгөрсөн хугацаанд нийт 400 литр цус бэлэглэж 3600 хүний амь аврах хүмүүнлэгийн энэрэнгүй үйлст өөрсдийн хувь нэмрийг оруулсан байна. Тус хүмүүнлэгийн өдөрлөгт оролцож авлагагүй донорын эгнээнд нэгдсэн нийт иргэд, албан хаагчиддаа талархал илэрхийлж, ажил амьдралд нь амжилт хүсье! хэмээн хэлсэн үгэндээ онцоллоо.

Энэ удаагийн өдөрлөг нь шинэ төрлийн Короновирусын халдвар гарсантай холбоотойгоор Улс орон даяар хорио, цээр тогтоосоноос цус, цусан бүтээгдэхүүний хангамж ердийн үеэс 50 орчим хувиар буурсан тул цусны нөөц бүрдүүлэх, цусны донорын үйлсийг сурталчлахад олон нийтийн оролцоог нэмэгдүүлэх, цусаа хандивлахын ач холбогдолыг таниулах зорилготой зохион байгуулагдсан ба дүүргийн ИТХ-ын төлөөлөгчид, Ажлын албаны ажилтан, албан хаагчид, Засаг даргын Тамгын газрын албан хаагчид болон 28 хорооны 180 гаруй иргэд хамрагдлаа.