Баянзүрх дүүргийн иргэдийн Төлөөлөгчдийн хурлын XI хуралдаан болж өндөрлөлөө. Энэ удаагийн хуралдаанаар
- Дүүргийн Засаг даргыг огцруулах саналыг хэлэлцэх тухай
- Төрийн дээд шагналд уламжлах тухай
- Хөтөлбөр батлах тухай асуудлыг хэлэлцсэн.
Баянзүрх дүүргийн иргэдийн Төлөөлөгчдийн Хурлын Эмэгтэйчүүдийн зөвлөлөөс хүүхдийг зам тээврийн ослоос сэргийлэх хөтөлбөрийн төслийг боловсруулсан. Монгол Улсад жилд дунджаар 1000 орчим хүүхэд зам тээврийн ослын улмаас гэмтэж бэртдэг. Мөн 2021 онд 50 хүүхэд, 2022 онд 25 хүүхэд осолд өртөж амь насаа алдсан байна.
Тиймээс цэцэрлэг, сургуулийн орчинд зам тээврийн осолд өртөхөөс урьдчилан сэргийлэх, хүүхдэд ээлтэй орчин бүрдүүлэх, хүүхэд зам тээврийн хөдөлгөөнд оролцох боловсрол олгох үүднээс энэхүү хөтөлбөрийг боловсруулжээ. Хөтөлбөрийн хүрээнд ерөнхий боловсролын сургуулиудын гадна орчныг судалж зам тээврийн ослын эрсдэлийг бууруулах цогц арга хэмжээг шат дараатай авах, хүүхэд болон асран хамгаалагчид, жолооч, бусад оролцогч талуудад хандсан нөлөөллийн олон талын ажлыг зохион байгуулах, замын хөдөлгөөний дүрэм, аюулгүй байдлын талаар мэдлэг олгох сургалтын төв байгуулах зэрэг тодорхой ажлыг хийх юм. Хөтөлбөр хэрэгжсэнээр сургалтын төв, дадлагын талбайгаар нэг хичээлийн жилд 19200-32000 бага насны хүүхдэд үйлчилж, мэдээлэл олгоно.
Мөн зам тээврийн ослын улмаас хүүхэд гэмтэх, улмаар амь насаа алдах тохиолдол буурна хэмээн тооцжээ. Энэхүү хөтөлбөрийг Баянзүрх дүүргийн иргэдийн Төлөөлөгчдийн хурлын XI хуралдаанаар хэлэлцэж 100 хувийн саналаар дэмжин баталсан. Мөн Баянзүрх дүүргийн Засаг даргыг огцруулах саналыг хэлэлцэх тухай асуудлыг хэлэлцсэн бөгөөд нийт гишүүдийн 100 хувийн саналаар тогтоолын төсөл дэмжигдсэнгүй.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна