АНХНЫ ТУСЛАМЖ АМЬ АВАРНА

“Анхны тусламж амь аварна” хэмээх үг нь аливаа осол, гэнэтийн нөхцөл байдалд хамгийн эхний зөв арга хэмжээ хүний амь насыг аврах шийдвэрлэх ач холбогдолтойг илтгэдэг. Иймд иргэн бүр анхны тусламжийн суурь мэдлэг, ур чадварыг эзэмших нь нийгмийн аюулгүй байдал, хүний амь насыг хамгаалах чухал хүчин зүйл юм.

Энэ зорилгын хүрээнд Баянзүрх дүүргийн Иргэдийн Төлөөлөгчдийн Хурлын Ажлын албаны албан хаагчдад зориулсан анхны тусламжийн сургалтыг амжилттай зохион байгууллаа. Тус сургалтыг Баянзүрх дүүргийн Эрүүл мэндийн байгууллагын төлөөлөл болох дарга Б.Хулан, арга зүйч Н.Анхсүх нар удирдан явуулж, оролцогчдод онол, практикийг хослуулсан цогц мэдлэг олгов.

Сургалтын хүрээнд дараах чухал сэдвүүдийг хамрууллаа:

• Амьсгал, зүрх зогссон үед үзүүлэх анхны тусламж (CPR) - Оролцогчдод зүрх, уушгины сэхээн амьдруулах арга (CPR)-ын үндсэн зарчим, дараалал, шахалтын зөв техник, амьсгал өгөх аргачлалыг зааж, бодит нөхцөлд хэрэгжүүлэх дадлага хийлээ.
• Хахалтын үед үзүүлэх анхны тусламж - Хоол, гаднын биет амьсгалын замыг бөглөх үед авах яаралтай арга хэмжээ, тухайлбал хэвлийн шахалт (Heimlich-ийн арга)-ыг зөв гүйцэтгэх арга барилыг практик байдлаар эзэмшүүлэв.

Сургалтын онцлог нь оролцогч бүрийг идэвхтэй оролцуулж, бодит нөхцөл байдалд тулгуурласан дасгал, симуляц хийлгэснээр онолын мэдлэгийг практик ур чадварт шилжүүлсэнд оршино. Энэ нь гэнэтийн осол, эрсдэлтэй нөхцөлд сандралгүй, зөв шийдвэр гаргаж, шуурхай тусламж үзүүлэх чадварыг нэмэгдүүлэхэд чухал ач холбогдолтой юм.

Тус арга хэмжээний үр дүнд оролцогчид:

• Анхны тусламжийн талаарх ойлголтоо гүнзгийрүүлж
• Яаралтай үед зөв дараалалтайгаар тусламж үзүүлэх чадвар эзэмшиж
• Амь нас аврах бодит ур чадварыг практик хэлбэрээр сурч авсан үр дүнтэй сургалт боллоо

Цаашид ийм төрлийн сургалтыг тогтмол зохион байгуулснаар байгууллагын албан хаагчдын аюулгүй байдлын мэдлэг, бэлэн байдал дээшилж, нийгэмд эерэг нөлөө үзүүлэх юм.